Yá chube l sol cun miedo l cielo arriba,
Nun ye clara la lhuç cumo era dantes;
La chelubrina nun anda yá tan biba,
I nun ándan ls rapazicos de musicantes.
Pareç que l’alegrie destas preinadas
Se trocou por nubricas anegradas
Pa de lhuito bestir la natureza.
António Maria Mourinho, Nuossa alma i nuossa tierra
La dibersidade lhenguística ye un zafio pa l’Ouropa.
Amin Maalouf
Nun podiemos passar por este dia 26 de setembro sien lhembrar que l Cunseilho de l’Ouropa i la Comisson Ouropeia propónen, deçde 2001, qu’este seia l Die Ouropeu de las Lhénguas. Sirbe este die para assinalar l’amportança de daprender lhénguas, d’oumentar l conhecimiento i la cuncéncia de l balor de las lhénguas i ancorajar a que se dapréndan outras lhénguas al lhargo de la bida. Trata-se, por isso, de festejar la dibersidade lhenguística i cultural de l’Ouropa.
Ls países efectibamente monolhengues son la sceçon mais que la regra… An Pertual, la sola sceçon que se puode andicar ye l mirandés ou fala de Miranda.
Miquel Siguan, La Europa de las lenguas
Apuis de las comemoraçones de ls 400 anhos de la cidade de Miranda i de l’einauguraçon de la barraige de Picuote, fui la beç de la cidade de Miranda tornar a recebir l Xefe de Stado, desta beç para einaugurar la sue barraige. Fui an 1971 i nun se sabe quei le habrá feito al çcurso que recebiu an 1959, metido i arrumado nun canudo de prata.
Delantre de la diferéncia lhenguística, ls homes tubírun siempre anclinaçon para se rir de l outro, cunsiderando la sue lhéngua cumo la mais guapa.
Louis-Jean Calvet, La guerre des langues
Miranda,
Bielha abandonada,
Inda nun sós bielha,
Eiqui stamos nós…
Inda bibes i siempre rebibes
An nós, que benimos
De nuossos abós.
António Maria Mourinho, Nuossa alma i nuossa tierra
Ua lhéngua ye solo l cuorpo d’ua cultura, i ua cultura ye ua einergie, ua buntade de poder.
Eduardo Lourenço, Une langue pour l’Europe
La lhéngua particular
Que l cunceilho sabe falar
Este antigo palabreado
(…)
Deberá ser respeitado,
Protegido, acarenhado.
Bazílio Rodrigues (10.07.1945)
La lhéngua ye un eilemento fundamental de l’eidentidade d’un andebido i de la cultura d’un pobo.
José Carlos herrearas, Lenguas y normalización
Por mi parte, direi que nun cunsidero l mirandés cumo ua lhéngua própia i outónoma, mas si, i solo, cumo u dialecto de l pertués.
Augusto Moreno, Mensageiro de Bragança (20.03.1945)
